CHURCH OF GOD
(Seventh-Day) Zimbabwe
Menu

Imigca Yokholo

Translate to English

  • Ibhayibhili Elingcwele

    Ibhayibhili kugoqela ithestamente elidala lelitsha, liyilizwi eliphefumulelwe nguNkulunkulu. Alila mpambaniso ekulotshweni kwalo kokuqala. Ibhayibhili liyilo kuphela elimqoka njalo elileqiniso ngendlela yokukholwa lokuziphatha koluntu.

  • UbuNkulunkulu

    USimakade wobuNkulunkulu kundalo yonke nguNkulunkulu. UMninimandla wonke yena okhonzwa ngomoya leqiniso. Yena ungunaphakade, kalasiqalo lesicino, ungcwele, ungumoya oziphilelayo owadalayo, uyalondoloza, uyabusa, uyasindisa njalo uyehlulela indalo yakhe. Munye kumvelaphi, ekuhluzeni njalo lokubeni nguye. Unkulunkulu uvezwa yimibhalo njengoBaba leNdodana.

  • UNKULUNKULU UBABA

    UNkulunkulu uBaba zonke izinto zingaye akekho osewake wambona kumbe ongambona, uyabusa ezulwini njalo uphezulu kokuzwisisa kwethu sonke. Uvezwe njengoBaba wethu osezulwini osithandayo. Uvezwe yiNdodana yakhe iNkosi uJesu Kristu. Ngesikhathi uNkulunkulu uzabuyisela yonke indalo kusimo esipheleleyo sokuthula ngoKristu njalo abuse iphakade kwabahlengiweyo.

  • UKRISTU INDODANA

    UJesu Kristu uyiNdodana kaNkulunkulu ezelwe yodwa. Njengozelweyo hatshi odaliweyo, wabelana loNkulunkulu uBaba imvelaphi, amabizo lakho konke ayikhokhona. NjengeNdodana hatshi uBaba, uJesu ungaphansi kukaBaba ngesikhundla. Kusukela phakade iNdodana yayiloBaba, isabelana loBaba inkazimulo, ingulizwi ingakazalwa okwenyama. EloBaba badala njalo bayalondoloza zonke izinto. UJesu Kristu (uMesiya ogcotshiweyo kaNkulunkulu) wazalwa yintombi egcweleyo uMariya ngamandla kaMoya oyiNgcwele, ngalokhu wahlanganisa imvelaphi ezimbili- eyobuntu leyobuNkulunkulu. uJesu waphila engelasono, wafa njengomhlatshelo wesono, wabaselibeni imini ezintathu lobusuku obuthathu, wavuswa elomzimba wenyukela kuyise ukuba asisize njengomkhumeli lomeli omkhulu. Uyabusa njengeNkosi ezulwini njalo uzapenduka emhlabeni engumahlulele leNkosi. Khathesi kuyamthokozisa ubaba ukuthi indodana iyabonakaliswa kuzozonke izinto njalo iyamukela ukumkhonza kwethu.

  • UMOYA OYINGCWELE

    UMoya oyiNgcwele ungumsizi wakomoya othenjisiweyo, uvela kuBaba leNdodana. UMoya uyibukhona lamandla kaNkulunkulu emhlabeni njalo uphila kubo abakholwayo. Ngomoya oyiNgcwele, uNkulunkulu uphefumulela njalo uveza imibhalo, uyafumana icala njalo uvuselela isoni, uyalungisisa, uyafundisa, uyaduduza, uyahola njalo uyanakekela (preserves) abakholwayo; njalo unika amandla okusiza. Ubufakazi boMoya oyingcwele kumpilo yekholwa kuyikukholwa kuKristu, ukuthobela intando kankulunkulu, lesithelo sikamoya sothando.

  • Umuntu, uSathani, ISono loKufa

    Uluntu lwadalwa ngomfanekiso kaNkulunkulu ungelasono ngenxa yalokhu lwalingelakho ukungaboli ngokudalwa. Ngokungalaleli kukaAdam loEva bonke abantu baba yizoni ngokudalwa/zalwa langokukhetha. Inhlawulo yesono sethu yikwahlukana loNkulunkulu, ukufa kwenyama (okungela kwazi,ukubona lokuzwa), phezu lwakho konke ukufa okunaphakade (ukubhubha) kwalaba abangamukeli usindiso esiluphiwa nguKristu. NguSathani isitha sikaNkunkulunkulu owalinga abazali bethu bakuqala ensimini yaseEdeni. UDeveli olokhu esenelisa ukuziguqula azenze ingilosi (isithunywa) sokukhanya kodwa ekupheleni uzakubhujiswa echibini lomlilo.

  • Umuntu, uSindiso, leMpilo

    Uluntu olulesono lungasindiswa kusigwebo sokubhubha iphakade njalo luthole ukuphila okuphakade esikhundleni sokubhubha, kuphela ngomusa kaNkulunkulu ngokukholwa kuJesu Kristu. Lokhu kungaphandle kwezenzo, imisebenzi loba imikhuba yomuntu. Ukuhlanzwa kwezono, lesithembiso dsempilo ephakade, kuza ngenxa yokufa lokuvuka kukaKristu esikhundleni ethu njalo kwamukelwa ngumuntu ngokukholwa lokuphenduka.

  • Ibandla

    Ibandla likaNkulunkulu kumibhalo lingumzimba wakomoya wabakholwayo abalokholo kuJesu Kristu njalo begcina imithetho kaNkulunkulu. Ibandla likhona umhlaba wonke lasezindaweni zonke. Lingaphansi kobukhosi bukaKristu lamandla ezwi likaNkulunkulu. Litshumayela ivangeli, likhulisa abakholwayo njalo lisiza uluntu. AmaKristu kumele aphatheke kuthumo lwebandla ngokusiza uluntu. Amakristu kumele aphatheke kuthumo lwebandla ngokusiza abanye lokuba lobudlelwano lamakholwa.

  • Izimiso zabaKristu

    Ukristu waphawula izimiso ezimbili ezifakaza ukholo kuye:

    (1) UBhabhathizo (ukucwiliswa), lulandelwa yikuvuma ukholo kuKristu lokuphenduka, kungumfanekiso wesiqalo sobudlelwano loKristu ngokufa esonweni, ukungcwaba (ukucwila) emanzini, lokuvukela empilweni entsha.

    (2) ISidlo SeNkosi sakusihlwa, yisikhumbuzo somnyaka ngokufa kukaJesu Kristu lapho amakholwa adla isinkwa legazi. Selula umusa kulaba abananza lesisidlo ngezinye izikhathi. Lesisidlo siveza ubudlelwano loMsindisi aze abuye njalo. Siqhutshwa kanye lokugeza izinyawo.

  • Imithetho elitshumi

    Imithetho elitshumu yayisaziwa njalo ilalelwa ngabakholwayo anduba imilayo iphiwe eSinayi. Phambilli yagoqelwa kusivumelwano esitsha ngomfuziselo langemfundiso kaKristu, imumethe isendlalelo somthambo wobuntu boluntu njalo ukulalelwa kwayo kuveza uthando lwekholwa kuNkulunkulu lakwabanye abantu.

  • Isabatha

    Usuku lwesikhombisa lokuphumula (iSabatha) liyisipho kuluntu esivela kuNkulunkulu kusukela ekudalweni. Lwalotshwa kumithetho elitshumi ngomunwe kaNkulunkulu, lwagcinwa lwafundiswa nguJesu, njalo lwananzwa libandla labapostoli. Luyisikhumbuzo sendalo losindiso, iSabatha limele lithakazelelwe ngokuthembeka ngabakholwayo khathesi njengosuku lokuphumula, lokukhonza lokwenza imisebenzi emihle.

  • Umtshado

    Umtshado yisimiso sikaNkulunkulu njalo yikuhlanganiswa kwababili, indoda inye lomfazi munye okwempilo yabo yonke ngesizatho sokuqhubekisela phambili uluntu lokuphuphumisa impilo yomuntu. Kuveza ubumunye phakathi kukaKristu lebandla lakhe, umtshado ungesulwa/ungephulwa kuphela ngibufebe. NjengeSabatha, umtshado usukela kuviki yendalo, uphakathi kwemilayo yobuntu, eyavuselelwa kumfundiso kakristu njalo ithola umutsho omqoka ekuphendukeni kwakhe.

  • Impilo yamaKristu

    Ubizo lwamaKristu ngelokuthi babengcwele kumicabango, kumazwi, lakuzenzo njalo baveze ukholo lwabo kuKristu ngokuzinikela kuNkulunkulu lokuphilisana labanye ngendlela yobuNkulunkulu. Njengomphumela-hatshi njengesizatho-sokuhlengwa; amakholwa kumele:

    (1) abe lobudlelwano loNkulunkulu ngokufunda ibhayibhili lokucubungula, ukuthandaza, ukuzila ukudla, ukukhonza lokumlalela.

    (2) aphathise uluntu kuzindingeko zempilweni lezakomoya ngozwelo langokukuphathisa kanye lokutshumayela ivangeli.

    (3) aphikise ukuzikhukhumeza, umhawu, ubuvila, ukudakwa, ukuminza lokunye okubi okuphambene lokukamoya.

    (4) ale ukuzithokozisa okuphambene lentando kaNkulunkulu okunje ngokubukela imifanekiso yabantu beze, ubuphingi abesilisa abafebanayo.

    (5) alandele izimiso zebhayibhili: ukunikela okwetshumi leminikelo ngothando, eyokuphathisa ibandla, lakunhlelo zokutshumayela ivangeli; badle kuphela ukudla lenyama ezithiwa libhayibhili ‘zihlanzekile,’ ukuphatheka empini bakuthathe njengento ephambene lobizo lwamaKristu lokuthi baphathise uluntu, baxwaye ukuhlanganisa isiKrestu lemfundiso ezingaphandle kwebhayibhili njengendlela okunzanzwa ngayo ilanga langesonto, eleKhisimusi, iEaster, iLent, iHalloween.

  • Isiprofethi

    Isiprofethi sebhayibhili siyamlondoloza lokumqinisa okholwayo kuthemba lokuza kukaKristu. Siyaveza izenzakalo kuhambo lwezokholo, inhlalo lezombusazwe kugoqela ukuzalwa kutsha kwesizwe sakoIsrael (ngemva kwempi yomhlaba yesibili), Lokhu kuveza ubuduze bokuza kukaKristu okuzaletha ukumiswa kombuso kaNkulunkulu waphakade emhlabeni.

  • Umbuso KaNkulunkulu

    Umbuso kaNkulunkulu (Umbuso weZulu) unanzeleleka ngeziqu ezintathu.

    UMBUSO WAMANJE
    Umbuso wakomoya womusa ukhona khathesi lapho uNkulunkulu abusa khona ezimpilweni zamakholwa amlalelayo. Lombuso wabikezelwa njalo wambulwa ngabaprofeti lakumfundiso yeNkosi yethu uJesu Kristu. Singena kulo umbuso nxa siguquka ezonweni zethu besesi sebenzela uNkulunkulu ngokukholwa kuKristu.

    UMBUSO KAKRISTU WEMINYAKA EZINKULUNGWANE
    UJesu uzaphenduka emhlabeni ngamandla lange nkazimulo ukuzovusa abafa belungile, abanikeze ukungaboli lempilo engunaphakade kugoqela labalungileyo abaphilayo, anikeze umvuzo kumakholwa njalo akhazimule kibo. Umbuso wakhe weminyaka ezinkulungwane uzagoqela yonke indalo, lapho ubukhokheli bonke, amandla lezitha kunqotshwa. Ekuphetheni kwalo umbuso abangalunganga bazakuvuswa babhidlizwe ngemuva kokwahlulelwa esihlalweni esikhulu esimhlophe sikamahluli.

    UMBUSO KANKULUNKULU WAPHAKADE
    Umbuso kaNkulunkulu waphakade uzaqala lapho uJesu esefake zonke izitha ngaphansi kwezinyawo zakhe, uzaqhubela uBaba lombuso. UNkulunkulu uzahlala labahlengiweyo kuZulu elitsha lomhlaba omutsha lapho kungekho inkathazo, ukungcola, ukufa akungeni njalo ukulunga lokuthula kobakhona phakade.